段片大約16分鐘開始, 透過一份大行報告, 去教人點分析一間保險公司
(段片好長, 由16分鐘開始睇5分鐘就夠)
我唔係cover保險公司的Analyst, 但係好明顯, 段片有好基本的Concept都講錯
主持人响17分鐘左右講話唔駛睇「壽險規模保費」, 睇「現金流」就夠
20分鐘開始講話唔駛理「新業務價值」之類
不過, 雖然我唔係一個咩高手, 但我都知道,
保險公司的「新業務價值」意思唔係純粹字面上所見的「新的業務」的價值
對於保險公司而言「新業務價值」的重要程度比「現金流」可能更大
下面呢篇講「新業務價值」個概念講得清楚又易明
http://www.orientaldaily.on.cc/cnt/finance/20150120/00275_002.html
簡單D黎講, 一張保單A今年一次過俾晒$10萬, 同另一張保單B由今年開始分10年每年俾$2萬
咁你睇年報時, 淨睇現金流的話, 第一張保單A一次過有$10萬, 梗係好過張保單B得$2萬現金流,
以為賣保單A的保險公司勁D抵買D, 但咁就大錯特錯了!
因為睇財務報表上的「現金流」係無包到之後9年的數字 (保單B之後9年會收多$18萬, 但當時年報上的現金流無反映)!
而「新業務價值」則係經過精算準則去計埋張保單日後的收入所得出的數字,
又或者可以話係果年做的生意(包埋日後的收入)响果年的價值
(我呢度只係簡單咁講個概念出黎, 要知更加準確的描述, 上網Search下就有)
保險公司唔同普通零售業,
如果睇保險公司睇「現金流」而唔睇「新業務價值」,
咁同分析一間零售公司時唔睇佢「盈利」、「現金流」無咩分別
要分析一間保險公司, 睇「內含價值」同「新業務價值」都非常重要
要透徹分析一間公司的基本面, 其實都好多學問, 睇唔同行業可能有唔同做法,
所謂的「基本分析」/「基礎分析」唔係好基本咁望幾眼, 睇幾個指標, 就叫分析左
好多人話「價值投資」、「基本分析」唔work, 但其實可能係自己學藝未精
另外, 教人之前都請先做下功課,
D人真係學左佢教果套而蝕錢的話, 就唔好啦...
(重申一次, 我唔係cover保險公司的Analyst, 歡迎討論, 有錯請指正)
沒有留言:
張貼留言