睇開我個Page/Blog的朋友應該知我呢幾年長時間都非常睇好大市。一兩年前經常講, 手持好股的話無咩好做, 要坐定定等收成。兩三個月前都仲話係牛市第二期, 未到瘋狂雞犬皆升的牛市第三期。(唔信的話可以睇返晒我咁多個Post, 有晒記錄)
近期指數升穿歷史高位, 縱觀多項指標, 再回顧一下歷史, 呢幾日開始, 我個人對大市的睇法開始有頗大轉變。
坦白講, 今次係我呢幾年來對大市睇法的一個極大轉變。
我不是由看好變看淡, 而是由看好變中立 Neutral。
個人覺得12月初的調整後開始的急升開始, 大市正式踏入牛市三期。
以下幾項指標已經幾明顯:
- 連升14日 (我之前寫果本書有幾個表講過連升/跌多天過往通常發生在咩時期)
- 極短期內發生的急升 (大多數泡沫爆破前都會有一次極短期的急升, 例如, 虛擬貨幣的市場。12月23日虛擬貨幣極短期內急升後, 出post講過要準備虛擬貨幣急跌時賺錢的計劃, 當日至今真的跌了近30%。)
- 每日成交額過千億
- 指數歷史市盈率約 17.2 倍 (與近20年平均數比較算偏高, 簡單來講指數現在即偏貴)
- 指數息率約 2.7 倍 (與近20年平均數比較算偏低, 簡單來講指數現在即偏貴)
- 有一些熱炒的主題, 今次頗明顯係新科技, 如虛擬貨幣/區塊鏈。早幾日甚至見到有超過一間上市公司話搞虛擬貨幣/區塊鏈業務, 結果股價隨即急升。這個情況同約20年前的dot com泡沫, 何其相似。
- 响街見到唔少人睇股價、講股票 (呢個現像有點以偏蓋全, 唔係咁客觀, 但都值得參考)
- 新股熱潮、新股上市後急升 (情況未算超級瘋狂, 但係感覺已經開始同2007年果次頗似)
不過亦有指標反映而家市場尚算健康:
- 環球經濟依然向好, 係多個國家的股市經濟都仲係幾好
- 指數市賬率約 1.5 倍 (不高不低) (呢個數字我唔肯定, 有錯請告知)
- 仍未見到禾雀亂飛、雞犬皆升的情況 (不過2015年果次都係咁)
去到牛市三期, 股票的基本因素, 公司賺唔賺錢, 派唔派息, 都唔夠市場上的參與者的情緒影響咁大。大漲小回, 甚至係利淡新聞都當好消息。市場上面有主題、有資金, 氣氛樂觀, 個市就係咁升。
過往幾次大牛市點發展, 或者有咩特徵, 我本書寫左好多篇幅, 呢度唔多講了。
既然响牛市三期, 咁應該點做呢?
大升市會否短期內幾個月就玩完? 我覺得唔會。市場尚未見到有咩主題/因素、潛在主題/因素能夠推倒大牛市。所以重申一次, 因未見有明確能推倒牛市的因素, 我不是由看好變看淡, 而只是中立 Neutral, 暫時亦不打算造淡。但不會再因為堅持係牛市, 而不斷唱好, 或者坐定定咩都唔做。牛市未玩完但相信較大調整在所難免。
以價值投資黎講, 似乎手上唔少公司的股價已經反映左價值。
牛三最瘋狂升得最急的時期可能未到, 但個人做法會係留意個別情況而開始逐步減持。
呢幾年黎除左有一兩次講過話手上高息股股價升得太多後, 股息率不再吸引而減持收息股/換馬外, 應該無提過話要減持, 而今次先係第一次。
按計劃最先講byebye的應該係股價無咩跟大市升過的公司 (有不少公司股價比歷史高位仲係低近一半, 無乜點升過)。
點解? 唔驚佢地追落後咩? 我都驚佢地會响我講完byebye時追落後, 但係個市升左咁耐兼破埋歷史高位, 兩三年來都未見佢地追落後, 點解會覺得而家先黎追落後? 而且, 响泡沫爆破/大跌市時, 落後的股票通常都會跌埋一份。
而最後留响手的應該會係一堆用作收息而基本因素良好的公司 (我的準則係市盈率低於10, 市賬率低於0.8, 息率6-10%)。
預算直到歷史市盈率去到約20倍 (與現水平距離約5000點), 應該清了接近一半倉。留返的一半倉就差唔多係上年所賺的淨利潤, 輸晒都唔會肉痛, 就由得佢繼續放風箏。
升市莫估頂, 我一定唔會沽清, 因為牛三最瘋狂升得最急的時期, 幾日可能回報百份比已達雙位數。但回調/下跌的時候亦會好急, 所以實在好難捕捉到近頂位的幾日。
但係好多股評人而家話賣左買唔返, 我一笑置之。兩年前又唔見佢地咁講?
市盈率真係去到20倍的話, 我唔信兩年內都可以保持到20倍的水平。兩年內我唔信無機會再買返, 不過到時可能係大市轉向, 俾你買得返都唔想要。
總結一句: 君子不立危牆之下。
沒有留言:
張貼留言