連升14天的奇景與大牛市最瘋狂時期的可能主題

有個多月無咩講過市況或者做咩動作, 不過唔經唔覺, 自從响上次的較大調整中增持後(可參考12月9日出的post), 出現了一個連升14天的奇景, 同當時比較, 個市升了接近10%。

一如所料, 牛市未完, 還創了多年的新高。



結果檢討: 一半經驗(實力), 一半運氣。

連升14天可以話係牛三的其中一個重要特徵 (可以參考返小弟本著作當中的幾個表, 連升多天通常發生在熊三至牛一的時期, 或者牛三瘋狂的時期)。某程度上可以確認而家係牛三。

每次大牛市最瘋狂時期總會有個主題, 我一直諗唔通, 亦睇唔到今次能夠推到大牛市最狂熱最高峰的主題會係咩。所以之前一路都覺得牛市未完, 甚至牛三都未到。

睇返早幾日外國的一家菲林公司因為話搞區塊鍵/虛擬貨幣之類而急升逾倍, 令我突然想通了。今次的大牛市主題, 有機會會係新科技股配合虛擬貨幣。我諗到本地股市黎緊幾個月可能會發展的劇本會係, 有上市公司話要搞虛擬貨幣之類云云, 而股價隨即暴升, 掀起一個新熱潮, 之後再將股市推上新高, 直到泡沫爆破。(當然, 這純綷是想像罷了。)

換言之, 牛三最瘋狂升得最急的時期似乎未到。不過, 睇返而家個市的市盈率同息率, 的確偏貴。所以, 暫時打算在現水平減持約5%, 之後再升再逐步減持。預計直到市盈率去到約20倍, 應該清了接近一半倉。淨返的一半倉就差唔多係上年所賺的淨利潤, 輸晒都唔會肉痛。

坦白講, 我唔信兩年內市盈率都能保持在現今水平, 所以現在減持的話, 基本上兩年內實有機會再買返(無錯, 我係睇得頗長遠的, 以年計的)。就算股市升得最急的最瘋狂時期可能仲未到, 我都覺得無必要賺到盡。