大師: 你叫咩名呀?
小弟: 獨沽求贏 (小弟筆名)
大師: 你想問咩呀? 財運? 工作? 姻緣?
小弟: 大師, 我最近讀返書, 唔知畢唔畢到業呀? 我幾時發達?
大師: 你個名中的「沽」、「求」、「贏」, 都係屬水, 但係「獨」呢就屬土喎, 水代表智慧, 但水淹土, 變得混濁, 即小聰明, 無大智慧, 甚至愚昧。
小弟: 咁即係點?
大師: 好大機會讀唔成書, 睇你個情況, 中學都未必畢到業, 更加唔好講話而家咁大個人先讀大學啦。
小弟: 唔係掛, 我早已讀完大學, 而家進修緊另一個學位了。
大師: 一命二運三風水四積陰德五讀書, 睇黎你憑自身努力補充了本身的不足, 咁唔駛擔心, 應該畢到業!
小弟: 咁我幾時發達?
大師: 命中無火又無金, 遇到貴人就發達, 遇不到貴人就發霉。
小弟: 幾時先有貴人?
大師: 可能要等下一個10年大運。下一個大運响立春之後開始。
* * * * * *
大師: 你想問咩呀?
小弟: 大師, 我想問隻XXX公司, 放唔放左佢好呀? 佢幾時先識升?
大師: XXX係一隻「炒股」, 無咩基本因素可言, 技術走勢亦麻麻。
小弟: 咁即係點?
大師: 唔應該買呢D股票。睇呢個情況, 好難會升, 稍為理智、有經驗的股民都唔會買呢D。
小弟: 唔係掛, 我半年前打電話問你時, 你話向上突破值得追入架喎, 點知買完之後跌到今日。
大師: 今時唔同往日, 唔同情況自然唔同睇法。睇黎果時係假突破。唔駛擔心, 應該仲有機會升的。
小弟: 咁即係幾時先識升返?
大師: 當炒時就炒得起, 唔當炒時就炒唔起, 有資金炒先識升。技術黎講, 升穿$10就上望$12, 跌穿$8就下會再下試。以技術黎睇, 再睇埋波浪理論, 轉勢時就可能會升。
小弟: 咁幾時轉勢?
大師: 以波浪理論黎睇, 可能要等下一次水星逆轉先會轉勢。立春前後吧。
* * * * * *
注1: 風水命理非精密科學
注2: 小弟唔熟波浪理論, 亦唔識命理, 以上純粹無聊創作, 歡迎高手指教