2007年8月17日－－10年前的大奇蹟日

唔知大家仲記唔記得10年前的「大奇蹟日」。

當日恆數大約在20000點左右, 一日之內最多大跌超過1200點, 但收市前不久反彈超過1000點。計返個跌幅同之後反彈的百份比, 都真係唔少野。

初哥們唔知「大奇蹟日」係咩的話, 值得上網詳細了解下。

今日見10週年, 專登睇返當年大奇蹟日幾個月後寫低的記錄。


節錄: "０７年的８１７一個大Deep V，令我真係開始明白「股市專收叻仔」呢句說話0既含意...... 次按出事，朝早大跌，晏畫因為出直通車消息大升，所以朝早走左貨0既人可以話係幾咁傻仔 (而我係其中一個)。諗深一層，佢地先至係最有先見之明的人 (０８年頭咪又係因為次按再大插多一鑊......"

記得果時係初初接觸股票頭幾年, 本錢太細, 連一手稍為的大型的股票都買唔起, 所以主要係玩中細價股。結果呢, 當然就出事啦。

大跌市當中, 中細價股通常跌幅較穩陣的大藍籌大。大家諗下, 20000點跌大約1000點, 即係近5%, 亦即係話指數成份股都平均跌近5%, 細價股更加嚴重。

到今日依然記得, 當日放緊假, 可以全日見證「大奇蹟日」的Deep V反彈。

因為朝早有「次按」新聞令市場悲觀, 諗清楚後亦認為單新聞將對市場有重大影響, 可能有排跌, 所以自己亦謹守股評人們建議的「忍痛止蝕」, 將手上頗大部份持貨沽出。沽完之後仲覺得自己好叻仔, 反應夠快, 又能控制情緒止蝕, 叻過其他散戶。

點知呢, 果日一沽完無幾耐就反彈。仲好記得呢, 自己止蝕的賣出價正正係當日的接近最低價 (亦可能係當時之前的幾年牛市以來的最低價)...

自從果次開始我就學識幾個道理...

1. 「股市專收叻仔」, 人算不如天算, 就算幾聰明, 分析幾透徹都未必有用。有唔少影響市場的消息或者資訊, 係預測唔到的。有睇開呢個Page的人都知, 呢度幾乎從來都唔會預測任何經濟數據, 或者經濟政策。

2. 股市的本質就係有不確定性。要响市場裡面做贏家, 就係要駕馭不確定性, 駕馭預測唔到的情況。

3. 股市同經濟係有關連, 但市場上的人的情緒同心情影響可以更大。

4. 「價值投資」所說的「市場先生」情緒真係可以變化得很快, 亦可能造就難得的機會。事實上市場又間中真係會出現呢類機會。

5. 一開始買入的決定做得正確的話, 將對之後影響好大。因為當時手上的持貨都唔係低位買, 而係短炒, 升D賣下又揀另一隻。所以一日的大跌市已經能令幾天的利潤化為烏有, 無得守, 自然會驚, 會想沽貨離場。但如果調返轉, 一開始成本價已勁低, 根本一日跌5%-10%其實都不足為懼, 有得守。

6. 短期大跌市 (配合良好基本因素), 反而可能係好機會。印像中, 當日的市盈率跌到低過10。

7. 分批買入或者賣出, 好過一次過咁買賣。起碼做錯決定的話, 都唔會咁大影響, 要補救亦較易。