離場策略 (高息股)

早前講過準備離場的部署 (https://goo.gl/xRrw8z), 只係事隔兩日, 筆者有部份股票已經到左預定的離場的時候, 所以都做左些操作... (雖然已持貨超過3年, 帶來唔錯的回報, 所以有感情, 但都係時候分段講再見!!)

唔同類的股票用唔同的離場策略。對於用黎收息的股票 (唔係成長股或者「煙頭投資法」所選的資產股), 唔寄望佢股價爆升的, 個人會用一個頗簡單的準則: 就係股價升、盈喜/盈警公佈、業績公佈減派息時, 導致新的股價的預計息率跌至某個數就走人。

例如, 市面上有其他超過4%的股息回報的投資, 但風險比上述股票低得多(4%純粹係一個例子, 可以因應個人情況而更改), 低過4%股息回報對於我黎講唔再吸引, 就不問價離場。

簡單例子: 一隻買入價時息率約8%的股票, 而家股價升了一倍, 又或者公佈盈警話盈利將減少一半, 咁新的息率將會大約得返4%, 咁就算到價離場... 股價之後仲會唔會升無人知道, 一般人都只係靠估(大約10年前的牛市30000多點時, 大把專家、散戶都調高目標價, 越估越高... 30000就估上32000, 去到32000又估會上35000... 咁搞法永遠唔駛離場, 短炒變長渣... 到最後結果係點唔駛多講...)。本來計劃用來收息的投資, 睇返實際股息回報黎作買賣決定, 已經係最理性、客觀同合理的做法。

再重申一次, 呢個方法筆者只會用在高息股。高息股亦較少是大牛市的當炒股。當高息股唔再高息, 市面上又有更好選擇, 點解仲要為左長線而長線持有?

根據以往經驗, 在大牛市時中途離場後股價都多數都會繼續升, 所謂「賺少左」, 但係快則幾個月, 慢則可能三幾年後, 其實又可能可以重新以高息率的低價格買返...

(注意: 呢個只係筆者呢個散戶個人的一套, 並非咩大行大戶、基金經理的方法, 只供參考。有人可能覺得自己神機妙算, 估到指數去到幾多, 又或者連六合彩開幾多號都估到0既, 可以唔駛理呢篇文章。)