再談離場 (高息股)

上次寫左篇文講高息股 (https://goo.gl/QXiNHp)。

有人問左個幾好的問題「......股價升對本金個息應該無變，係新買先變相少左息，走左佢去找高息又未升的股，個d通常質素差，如果本身一早買夠貨，洗咩無啦啦走......」, 我嘗試解答自己0既睇法...


一般黎講, 的而且確, 多做多錯, 大多數時間坐定定乜都唔做就可能就係最好的決定。

好多人都遇過你所講的「升0既股票通常繼續升 (因為可能公司優質/出現「催化劑」、公司利好消息/「轉勢」等等), 換馬另一隻後反而唔郁甚至跌」, 但呢個情況對「消息股」、「成長股」之類股票影響較大。

不過, 正如上文所講, 而家講緊係一個大升市時離場的準則。如果驚「升0既股票通常繼續升, 換馬另一隻後反而唔郁甚至跌」, 咁任何股票升0既時候都會有同樣情況, 亦即係任何升的股票都唔應該賣。

而家股市係接近近兩年高位, 文中所講的股票例子亦持貨了近3年, 股價、息率已經去到一個值得做決定0既時候, 唔係「無啦啦走」, 而係真係從價值出發去決定去留。

從價值投資角度而言, 應該無咩人反對價格遠超價值時候可以離場。如果股價doubled, 派息金額不變, 就算價值不變, 價格同價值之間的距離都都明顯遠左好多。

文中多次重申只用於「高息股」(當然唔係指十年唔派息, 突然一年派高息果種), 其中一個原因就係高息股大多數都係「非成長股」, 或者公司已經處於守業狀態, 大多數利潤以股息形式分派俾股東的狀態, 例如公用股。憑經驗黎講, 呢類股票, 縱使有催化劑令佢近期股價上升, 都唔會爆升得去邊, 一年裡面股價波幅甚至可能少過30%。

Assume all other factors being equal, 同樣要黎收息的話, 公司A有較肯定的8%實際落袋的股息回報+股價唔知幾時先識升, 而公司B則有4%股息回報+股價「可能」會繼續升(但往年股價波幅少於30%)的誘因, 你會選擇邊樣?

再以「價值投資」中的「市場先生」的觀念解說多一個例子: 如果你有間工廠, 投入資金$1000萬, 每年回報80萬, 但而家有個有錢佬心情大好, 樂意用$2000萬買左你間廠, 而你又有其他門路用果$2000萬開返兩間每年回報80萬(合共$160萬)的工廠, 咁你會唔會因為驚個有錢佬聽日心情更好「可能」出價$3000萬, 而覺得永遠唔應該賣盤?

再進一步, 唔以價值投資角度咁睇, 而以炒賣角度黎睇, 你買入時股息對比本金有8%, 但對其他並無持貨的人(包括大型投資者)黎講, 相同的公司, 佢地而家買入的話只係派4%, 就變得唔吸引, 或者係貴。(Discounted Cash Flow Model 雖然好似好學院派, 但係現實中亦有唔少大型投資者會用黎做估值。)

講得太遠了, 始終投資/炒賣都係各師各法, 你未必同意我的決定, 而我的決定亦可能會賺少左。這只是憑自己經驗同知識所知, 覺得已係最理性、客觀同合理的其中一種方法。