零成本乜乜法??

以2017/7/28收市價計算
恆生指數市盈率: 14.82
恆生指數週息率: 3.23

股市近期升下升下, 市盈率同週息率已去到接近近20年的中位數, 唔算平亦唔算貴。

另一方面, 唔少公司都發盈喜、盈利增長, 又或者加派息, 市盈率可能會下降/週息率可能會上升, 也許能夠支撐大市再下一城。但股市去到而家水平, 長線投資角度而言, 值博率已唔太高。

市盈率較容易從會計方面作出修飾, 而息率則係確實派發到股東手上的現金股息的比率, 所以我個人比較看重週息率。

早半年, 指數週息率唔少時間接近4%, 以借貸形式去買指數基金/債券賺息差 (就自己個人所見, 散戶層面槓桿投資的話, 息率最平大約2%多近3%), 都叫做仲有肉食。但去到而家呢個水平, 靠借錢去買指數基金/股票賺息差, 似乎已經無乜肉食。

坊間有些財經書教人「零成本投資」(注: 亦有人定義「零成本投資法」為「股票上升時或收了不少股息後, 賣出部份數量, 取回成本金額, 留下盈利部份繼續由它增長。這篇文則指借貸買入賺息差。)、「零成本收息」、「以息養息」之類的方法。讀者閱讀時應格外小心, 那些財經書作者寫書的時候, 那套方法可能仲Work, 但今日可能已經唔Work。走去借錢投資, 風險高之餘, 操作起上來更易受個人情緒影響。一旦市況逆轉, 很容易措手不及。

十幾年前其實已有個很出名的財經Blogger, 提出這種賺息差的投資法, 還記錄了實際操作。我當年剛學投資, 看了他的Blog也好像發現新大陸般。現在不少財經書都可能是拾他牙慧罷了。不過好多新一代的投資初學者未必認識那Blogger, 印象中據他的Blog所述, 他當年以借貸/孖展重注買了當時被認為「好穩陣」的某銀行股票。可是, 那銀行股票在金融海嘯時首當其衝大瀉了超過一半, 如果真係跟他操作, 應該早就被斬倉, 輸得一乾二淨。他的Blog後來亦從網上消聲匿跡了。

想當年金融海嘯, 我都有用呢D所謂「零成本乜乜法」, 印象中當時的選股表現不錯, 跌幅比指數還小, 但虧損卻因槓桿而放大了很多。好彩自己當年個本唔大, 輸左都好快搵得返。不過, 就真係體驗到借貸/槓桿投資的實際操作困難。從此, 只會响真係值搏率夠高, 回報率夠穩定的時候下才會運用適量的槓桿。

話又說回來, 由於自己早已>100%持股滿倉 (部份持貨是在指數約20000點之下時, 以較低息借貸成本去買入的較高息又穩定的指數基金, 所以計及槓桿是>100%), 個人唔會估大市走勢, 只會做少量換馬, 主要策略仍然是按兵不動。現有持貨, 就當係繼續放多陣風箏。