昨晚去左聽巴黎Sir (巴黎的價值投資網誌作者) 課程的最後一堂, 非常熱鬧。
放學時見有學生專登帶左巴黎Sir 3年前的第一本著作《大學沒有教的股票價值投資法》搵佢簽名, 我都感到非常高興。我呢D後輩, 能夠參與編輯佢第一本著作, 絕對係我0既榮幸 (借D依沾一沾佢光)。
雖然我係外資投資銀行出身, 有段時間專做電腦交易系統 (演算法交易 Algo trading / 高頻交易 high frequency trading系統), 亦坐過炒房Trading floor, 日常工作同價值投資某程度上係互相違背, 但我個人係信奉價值投資這一派的。
分析一間公司可能有錯, 只好怪自己學藝不精。相對於炒技術分析、圖表、公司異動之類的門派, 我覺得價值投資對散戶而言, 最合理、最合邏輯亦最易實踐。
好多人唔知道, 當年出佢呢本書《大學沒有教的股票價值投資法》花左幾多心機同時間。
本書300多頁, 10幾萬字, 睇落好薄, 揀紙專登揀薄D的, 方便讀者拿起來閱讀 (唔少其他財經書專登用好厚的紙, 200頁左右的書都做到好厚, 因為定價可以定貴D, 購買者錯覺以為咁大本所以抵買)。
個封面看似簡單, 有點像古典書藉/秘笈, 但其實經過精心設計, 例如, 透明反光膠的錢幣符號印在一堆財務比率名詞上, 寓意係「在財務報表上發掘公司隱藏的價值」, 係價值投資精粹之一。
後生的投資者可能唔知, 10年前金融海嘯前的大牛市, 有好幾個人氣財經Blogger, 但因為提供Blog服務的網站結束相關業務, 有很多著名Blogger都沒有搬到其他Blog, 從此封筆。
記得大約4年前, 巴黎Sir仍在用舊的Blog, 因為那邊快要關站, 而我又是巴黎Sir的Blog的長期讀者, 由差不多10年前第一篇文章開始睇到今日, 覺得如果佢舊Blog的文章因關站而從此消失會非常可惜, 所以最後膽粗粗直接聯絡佢, 再經穿針引線, 造就了那本書的誕生。
2013年左右開始籌備果本書, 因為財經書銷量同股市有好大關連, 而2013年股市其實麻麻, 要搵出版社出版非常之難 (後期一堆財經Blogger出書就係後話了, 但呢本書可能算係帶領左財經Blogger出書的風潮)。
一本書的定價有大約50%給了發行商/書店, 賣到超過1000本已經唔易, 真係落到出版社同作者個袋真係少之又少, 唔係有心宣揚或者分享理念, 真係好難有動力去完成一本書。
當時, 本地的價值投資大師, 除左大約10多年前投行分析師林森池大師所寫的兩本書外, 真係好難數到仲有邊本本地的價值投資書叫得上做經典。
日常媒體所講的「投資」, 大多數都係睇股價上落, 短線炒賣, 初學者根本無咩渠道向真正大師學習咩叫投資。
我自己都係開始投資3/4年後接觸到林大師的電台訪問同著作, 先有個新思維「投資股票其實係投資股票背後的公司經營的生意」。
所以做《大學沒有教的股票價值投資法》呢本書的時候, 我有個目標: 要令呢本書成為本地價值投資的經典書藉。
3年後回看, 我相信這目標算係成功達成左。
為左包含最好的文章, 所以重覆加減/修改左好多次, 又趕住想在書展前推出, 結果搞到初版有唔少錯字, 我都勁唔好意思, 辛苦了讀者。
佢本書出左之後, 唔少初學投資的朋友話覺得頗深奧睇唔明, 其實我都贊成的。初學投資者好多時會覺得短炒幾日, 甚至Day Trade賺幾個%, 睇下圖炒下, 一朝致富就最好, 甚至覺得價值投資唔Work, 又點會花時間去學會計、睇財務報表?
响大牛市賺錢唔難, 但經歷完一個完整的經濟週期後仲賺緊錢的就少之又少。無返10年8年的經驗, 好難明白價值投資係點樣一回事。
我自己上年花左唔少時間寫的《炒股唔輸錢兵法》, 好簡單咁將自己10幾年來的經驗寫低同分享下投資的心態、散戶的謬誤, 就係為左令初學投資的朋友對投資有多一點理解, 亦填補初學者由咩都唔識去到閱讀《大學沒有教的股票價值投資法》這較進階的書之間欠缺的知識。
講下講下, 講遠左少少。
無論如何, 衷心祝福他退休生活愉快。
《大學沒有教的股票價值投資法》、《炒股唔輸錢兵法》兩書的出版社網址:
http://publish.hk-businessonline.com
感謝求贏兄令這本書能夠面世,和你的合作非常愉快,知道你將要迎接新的挑戰,祝兄百兄竿頭,更進一步。
回覆刪除