談談虛擬貨幣

就快到年尾, 今年回報應該很不錯, 但比較起早期已開始炒賣虛擬貨幣的人, 回報看來還是頗遜色。



有朋友之前在hedge fund做, 搞high frequency trading之類, 係一個電腦高手、科技 tech人, 30出頭有返咁上下高級同收入, 大約早兩年已經見佢話要掘礦, 近期無再打工, 炒虛擬貨幣話已經高過佢之前月入, 只靠信念, 就賺大錢。

類似情況下, 亦有好多人可能連虛擬貨幣係咩, 背後點運作都完全唔知就加入炒賣, 淨係覺得會繼續升, 咩分析都無, 咩都唔識, 但最後賺個盤滿砵滿。

自己其實都幾年前開始已有留意虛擬貨幣, 但計算唔到其價值, 所以一路都無參與。大約大半年前見有駭客勒索軟件收取虛擬貨幣時先明白到其潛力, 正式少量參與, 但賺了幾成就離場了。

比較之下, 某些(不是所有) 股票的價值, 總會有數得計。自己曾經持有唔少股票, 有耐性坐到佢大升50%或以上, 甚至超過一倍後才離場。相反, 虛擬貨幣價值幾多, 真係唔知點計。

文中提及的一個概念, 令我印像深刻, 就係有關虛擬貨幣定價的貨品的價值。例如, 一個月前用10000蚊虛擬貨幣才能買到一架車, 一個月後的今日虛擬貨幣升值了5倍, 變成2000蚊虛擬貨幣就買到同一架車。換句話說, 一架車的價值一個月內貶值到得返一個月前的20%。虛擬貨幣狂升, 而任何以以虛擬貨幣定價的貨物價值都會急劇下跌, 咁樣0既「貨幣」仲係咪真係貨幣?

每一個狂潮, 遠至過百年前的鬰金香狂熱, 或近至虛擬貨幣的大熱, 越理性穩重的投資者, 反而越不及純粹靠運氣盲目炒賣的人賺得多。

從虛擬貨幣的理念同背後技術運作層面而言, 我不會說虛擬貨幣是騙局。但我亦不得不承認, 自己技不如人, 未能擁抱一個泡沫去賺一個提早退休的機會。


<<David Webb：比特幣是世上首個無人操控的龐氏騙局>>
https://hk.finance.yahoo.com/news/david-webb-%E6%AF%94%E7%89%B9%E5%B9%A3%E6%98%AF%E4%B8%96%E4%B8%8A%E9%A6%96%E5%80%8B%E7%84%A1%E4%BA%BA%E6%93%8D%E6%8E%A7%E7%9A%84%E9%BE%90%E6%B0%8F%E9%A8%99%E5%B1%80-080300776.html